2Pe 2 | SWP | STEP | Na doha peroveta borabora headi se tubu tatao boeadi eai, omi boeamiu eai hinage taulauheata borabora abo se tubu‐eamuyamui, se hetatagorigorimiu, eda Tanuaga, tauunehaidi wa, se uharaei, abo se heula ariri se hebaaeauioidi.

2 Peter 2

Taulauheata borabora, riba abo se buidi, ribahesanapuena.

1 Na doha peroveta borabora headi se tubu tatao boeadi eai, omi boeamiu eai hinage taulauheata borabora abo se tubu‐eamuyamui, se hetatagorigorimiu, eda Tanuaga, tauunehaidi wa, se uharaei, abo se heula ariri se hebaaeauioidi. 2 Tatao se gamagari edi lelehi bii laulaudi abo se laulauedi, isi debadi eai, eo dobila mamohoina ta wasana abo se hebaaea. 3 Aiaromagigiri debana eai ao‐borabora ribadi eai abo se abimiu doha edi uneune; adi giru maisana beabeana eai i laoma e wau‐ta, taba nige i bebeda, nige i enohai, sora baaea abo se hearo.

4 Ena Eaubada aneru headi baaea tauhetubuna wa nige i nuatoatoaidi na i gabadobedi gehena eai, i moselaedi masigiri duhadi eai i lau e hedudurai huiana; 5 eo ena tanoubu mumuga eai nige i nuatoatoaei, Noa iabom i gorai maena tataodi haligigi‐labui mo, laulaududurai tau tau‐wasaina wa huiana ne dibori utuutu i hetamaridobei tanoubu eai taumia, eo Eaubada tau‐mia‐murimuriena, potadi eai; 6 eo ena eanua labui wa, Sodoma eo Gomora, i heasibuidi se hemala ahu mo, edi baaea debadi eai i riba‐hematedi se hemala tautau Eaubada tau‐miamurimuriena enadi; 7 ena tau dudurai Lota iabom i hemauri, tatao baaea edi laulau bii debana eai nuana se porohe ariri wa (tau dudurai ta isi boeadi eai i miamia, edi laulau i itaitaidi i ataataiedi, edi hemahemanabara nuana duduraina wa se hetausiololo), 9 hede Guiau abina i ata Eaubada tauataiena noho boeadi eai i girihaidi, eo tatao baaea maisadi i nuatunonohai i lau e hedudurai asubenana eai, 10 eo isi wa hinage buluma dobilana eai mo se laulau, lelehi biibiidi eai, eo tanutanuaga se isuewaidi.

Se nuaoiura ariri isibom se tanuagauioidi, tatao lolodi se isugaraedi, nige se matausi, 11 aneru, isi mo se sae ariri wa, gigiboridi eai eo adidiridi eai, taiede lauhegiru ribadi taba nige se hetorodi Guiau matana eai. 12 Na ina tatao ta, doha ginauri se hetubudi nige nuadi, doha suisui, se labasidi bena maraitom‐asubena abo se toaidi se unuidi mo, ginauri se supusupuedi iaede se hegihegirudi, mamohoi hinage abo se baaea eo isibom ede se hebaaeauioidi, 13 baaea abo se hearo edi baaea maisana. Tatao ta edi aiaihea buluma eai se lauheamna, asubena eai hinage se laelaei. Isi doha asiebo heiheinoina, doha bonu baabaaeadi boeamiu eai, se patulaowa arimiu eai, se ai‐mataasi, se kodekodei. 14 Ganaganawari matadi se monau, baaea eai nige begana se tausiololo. Tauberuberu se woea‐hegegedi. Aiaromagigiri eo gadolelehidi nuadi se manasa ariri. Merumeru se ribahematedio, ede isi! 15 Dobila mamohoina se nuagabaei, se nuagabaei, se gege doha Balama, Beora natuna, ena laulau wa, ia gogo, abi‐baaea eai i lobai, i gadosisiaririei, 16 na ena baaea wa se ribasuui; asina unaunana doga arinana eai i ribariba, peroveta ta ena eauyaure eai i hetarutoro. (Num. 22.5, 7.21-31.)

17 Tatao ta doha ipu nige goiladi, doha goura mana lailai ie toa abo i eohoilaei, masigiri lailaina i lau e nige nosina, enadi se tauribaiyao. 18 Riba borabora dagugu lailaidi se ribaribaedi, buluma lelehidi biibiidi se hepaisoadi bena tatao se niurihaidi, se tanuagaidi, headi wa aboina mo taumiaponori se dagogabaedi. 19 Se ribahesunumaedi si ene abo iairihai se mosedi bena isibom nuadi se lauwatai, ia mo isi hinage tau‐auau, baaea heahearina eai se laulau; paana ginauri saha tau i audidini, ia tanuagana ede meta. 20 Paana ena headi tanoubu ena hebii se dagogabaeyao eda Guiau eo Tauhemaurida Iesu Keriso italobaina debana eai, abotai abo wau ginauri wa se hetatapilipiliuioidi se unuidi, adi ao murimuritana abo i baaea ariri ede, nige doha adi ao bagubagunana. 21 I lolo mo taba laulau‐dudurai dobilana isi sora ma‐hekaudi, ena laugagaeo tabuna se mosedio abotai se sinibui se nuagabaei. 22 Riba sanapu wa i patu‐mamohoi aridi eai, si ene, Kedewa ie uio iabom maliwena ie ai, eo salaibawesina se hedui wa, ie uio monomono eai ie i’o.